Vendimin e Gjykatës për 17 të akuzuarit, që u arrestuan të mërkurën ditën kur u mbajt protesta nga opozitarët, avokatët do të ankohen në Gjykatën e Apelit

Avokati i të akuzuarit Albert Memaj, Skënder Musa shpreson se Gjykata e Apelit do ta përmirësojë vendimin e shkallës së parë per shkak se nuk ka asnjë rast të vërtetuar që të dyshuarit kanë qenë të përfshirë në veprat penale për të cilat ka thënë prokurori.

Ndryshe para disa minutash Gjykata ua ka shqiptuar nga 30 ditë paraburgim 17 të akuzuarve, pjesëmarrës në protestën e 18 nëntorit.

Sipas vendimit të gjykatës të akuzuarit nëse lihen të lirë mund të ikin dhe mund ta përsërisin veprën.

Këtë masë paraburgimi e ka kërkuar Prokuroria Themelore në Prishtinë, duke i rënduar me akuzat për pjesëmarrje në turmë dhe huliganizëm.

Protesta e opozitës kishte eskaluar në dhunë pas arrestimit të deputetes së AAK-së, Donika Kadaj-Bujupi, të cilës po ashtu i është caktuar paraburgimi prej 30 ditësh për veprat e saj brenda Parlamentit të Kosovës.