Dy deputetë të Kuvendit të Kosovës, Vjosa Osmani e Ilir Deda, kanë dalë sot me një propozim që liderët e partive politike në Kosovë ta nënshkruajnë një marrëveshje politike për t’i dhënë fund krizës dhe bllokadës politike në vend.

Ata dy kanë hartuar kornizat e kësaj marrëveshjeje në të cilën parashihet që Kuvendi i Kosovës duhet ta themelojë një Komision hetimor të udhëhequr nga opozita për ta shqyrtuar Marrëveshjen për demarkacionin e kufirit me Malin e Zi.

Sa i përket Asociacionit të Komunave Serbe, marrëveshja e propozuar parasheh që Kuvendi i Kosovës do t’i zgjedhë dy anëtarët e rinj të Gjykatës Kushtetuese me qëllim që vendimi i saj për kushtetutshmërinë e parimeve për themelimin e Asociacionit të Komunave Serbe të bëhet me Gjykatë Kushtetuese të kompletuar

Ndërsa, në rast se vendimi i Gjykatës Kushtetuese nuk i zgjidh dilemat për Asociacionin, ata propozojnë që Kuvendi i Kosovës t’i drejtohet Komisionit të Venecias për sqarime shtesë.

Sipas tyre, kjo marrëveshje do të duhej të nënshkruhet nën mbikëqyrjen e Presidentes së Kosovës, në ushtrim të rolit të saj si faktor i unitetit politik në vend.