Më 15 shtator nis gjykimi ndaj Salih Mustafës në Hagë

22:22 | 18 Qershor 2021
Gita

Dhomat e Specializuara të Kosovës kanë caktuar gjykimin e parë në këtë gjykatë.

Trupi gjykues i Dhomave të Specializuara ka vendosur që procesi gjyqësor ndaj Salih Mustafës, të fillojë më 15 shtator 2021.

Sipas njoftimit të Gjykatës Speciale, Prokurori i Specializuar do të ketë në dispozicion tre orë për deklaratën e tij hyrëse kurse përfaqësuesja e viktimave një orë e gjysmë, shkruan arbresh.info.

Kjo është çështja e parë para Dhomave të Specializuara të Kosovës për të cilën do të fillojë procesi gjyqësor.

Zyra e Prokurorisë Speciale (ZPS) në Hagë më 09.06. 2021 kishte kërkuar që më 12 korrik të këtij viti të nisë gjykimi në rastin e ish-pjesëtarit të Ushtrisë Çlirimtare të Kosovës, Salih Mustafa, por këtë datë e ka kundërshtuar mbrojtja e të akuzuarit, e cila propozoi që fillimi i gjykimit të nis pas pushimeve verore./arbresh.info/