Junta ushtarake në Mianmar ka urdhëruar këtë të premte që të ndërpritet interneti në vend.

Ministria e Transportit dhe Telekomunikacionit ia ka përcjellë këtë lajm të gjitha kompanive që sigurojnë internetin në vend, duke thënë se rrjeti do të jetë i fikur deri në një njoftim të dytë.

Dhuna në vendin e Azisë Juglindore është përshkallëzuar gjatë javës së kaluar, si në numrin e protestuesve të vrarë ashtu edhe me sulmet ajrore ushtarake kundër forcave guerile të pakicës etnike Karen.

Këshilli i Sigurimit i OKB-së dënoi fuqimisht përdorimin e dhunës kundër protestuesve paqësorë.

Ndërkohë, Kina dhe Rusia, të dy anëtarë të përhershëm të Këshillit të Sigurimit kanë kundërshtuar sanksionet ndaj Mianmarit.

Deklarata erdhi pasi i dërguari i posaçëm i KB për Mianmarin paralajmëroi se vendi përballet me mundësinë e luftës civile dhe kërkoi që të ndërmerren veprime menjëhershme.

Shumë qytetarë po largohen në Indi dhe në Tajlandë, ndërsa Zyra e Kombeve të Bashkuara për të Drejtat e Njeriut për Azinë Juglindore u bëri thirrje vendeve në rajon të mbrojnë të gjithë njerëzit që largohen nga dhuna dhe persekutimi në Mianmar dhe të sigurojnë që refugjatët dhe migrantët e padokumentuar të mos kthehen me force