Një burrë që shkoi për shëtitje me qenin e tij në Alpet Italiane ka mbijetuar shtatë net në të hapur, i bllokuar pasi kishte rënë dhe kishte thyer kyçin e këmbës.

Shpëtuesit në një helikopter panë burrin të shtrirë pranë një përroi të enjten në malet në veri të Udine, Italia veri-lindore. Ai ishte i mbuluar me gjethe, por ata kishin parë batanijen e tij me fletë metalike aty pranë.

Burri, 33 vjeç, ishte i uritur dhe i etur, por tha se qeni “më ndihmoi të mbijetoja”.

Ai u gjet në një lartësi prej gati 700 metrash, raporton BBC, transmeton arbresh.info.

Burri, nga qyteti veri-lindor i Triestes, ishte në një pjesë të Luginës së Venzonassa e paarritshme për telefona celular. Ai ishte tërhequr zvarrë në një përrua, kështu që kishte arritur të pinte pak ujë. Ai u gjet i vetëdijshëm, por i mavijosur keq.

E dashura e tij kishte njoftuar të mërkurën shërbimin e shpëtimit të malit dhe shpellave Friuli (CNSAS), pasi ajo kishte pritur që ai të kthehej të hënën. Ai kishte shkuar në ecje të tilla në vitet e mëparshme, duke qëndruar në kasolle malore ose strehimore të improvizuara.

Qeni i tij i racës së përzier Ash qëndroi me të dhe i bëri shoqëri, gjë që e ndihmoi të mbijetojë, thotë ai.

Ash është tani nën kujdesin e shpëtuesve, ndërsa burri po trajtohet në spital pas përvojës./arbresh.info/