Qendra Kosovare për Studime Gjinore ka vlerësuar se kënga “Nuse, Mësuese” nga Shkurte Fejza dhe Gresa Behluli përmban gjuhë të urrejtjes dhe promovon nënshtrimin e grave.

Kjo këngë bëri bujë të madhe, dhe nxiti reagime të shumta nga të gjithë, shkruan portali arbresh.info

Reagim pati edhe nga deputetja nga radhët e Partisë Demokratike të Kosovës, Blerta Deliu.

Deliu deklaroi se gjuha seksiste dhe abuzive që njëherësh nxit përçmim ndaj grave është shumë dominante në shoqërinë tonë.

Postimi i plotë i saj pa ndërhyrje:

“Gjuha seksiste, abuzive dhe një diskurs i përgjithshëm publik që nxit përçmim ndaj grave është shumë i theksuar, për të mos thënë dominant në shoqërinë tonë dhe kjo gjendje shqetësuese nuk është aspak temë për argëtim!
Gratë e fuqishme fuqizojnë gratë!
Ky duhet të jetë parimi udhëheqës për gratë, të cilat kanë ndikim në shoqëri. Duhet ta shfrytëzojnë influencën dhe rolin e tyre në shoqëri për të promovuar vlerat e barazisë duke luftuar stereotipet dhe gjuhën përçmuese e abuzive ndaj grave dhe jo anasjelltas.
Në anën tjetër, lus mediet që të mos promovojnë asnjë përmbajtje që kultivon gjuhë përçmuese e abuzive ndaj grave”. /arbresh.info/