Unioni i Bizneseve Shqiptaro-Gjermane (UBSHGJ) është i bindur në luftën e pastër çlirimtare të UÇK dhe drejtuesve të saj, andaj me shqetësim të madh po përcjellë ngjarjet pas ngritjes së aktakuzave dhe burgosjes së Presidenti Hashim Thaçi, ish-kryeparlamentarëve Jakup Krasniqi e Kadri Veseli si dhe kryetarit të grupit parlamentar të LVV, Rexhep Selimi.

Në një komunikatën e lëshuar nga UBSHGJ, thuhet se drejtuesit e UÇK të rreshtuar krah shteteve demokratike evropiane, SHBA dhe NATO, u vunë në shërbim të popullit shqiptar të vuajtur e të persekutuar, të vrarë e të dhunuar, të përndjekur e të dëbuar, u vunë në shërbim të arritjes së vlerës më sublime të një populli, të arritjes së lirisë dhe krijimit të Republikës së Kosovës”.

“Çmimin e lirisë populli shqiptar i Kosovës e pagoi me më se 13,000 të vrarë prej të cilëve 1,372 ishin fëmijë, me më se 20,000 gra e vajza të dhunuara, me shumë vuajtje psikologjike e fizike e deri me dëbim të afër 1 milion qytetarêve shqiptarë nga trevat e tyre shekullore”, thuhet në komunikatë, transmeton Telegrafi.

“Liria ka çmim, por liria ka edhe emër, e ai emër është UÇK dhe aleatët e saj”.

“Andaj të bindur në pafajësinë e të gjithë të akuzuarve, presim lirimin e tyre sa më të shpejtë dhe kthimin pranë familjeve dhe vendit të tyre”, përfundon komunikata.