Vetëvendosje ka mbajtur një konferencë për media në të cilën është folur për marrëveshjen e 4 shtatorit të arritur mes Kosovës dhe Serbisë në SHBA.

Glauk Konjufca,  para medieve tha se nëse në të ardhmen vjen qeveria me në krye VV-në, atëherë nuk do ta respektojë këtë marrëveshje.

Sipas tij, me marrëveshjen në fjalë është shkelur Kushtetuta e vendit.

“Një kryeministër jo-legjitim si Hoti shkon atje dhe e qet nënshkrimin në nja marrëveshje që Kosovën e kthen në një subjekt jo-serioz të raporteve ndërkombëtare. Kushtetuta thotë se Kosova anëtarësohet në organizata ndërkombëtare. Nënshkrimi i Hotit në marrëveshje e shkel Kushtetutën e Kosovës. Këtë fjalë timen dua ta përfundoj me dy konstatime. Që kjo është një marrëveshje shumë e dëmshme për Kosovën me tema që përpara i ka shtyrë Vuçiqi. Këto marrëveshje qeveria e ardhshme e VV-së nuk ndjen asnjë obligim që t’i qëndrojë prapa nënshkrimeve të kryeminsitrit jolegjitim Avdullah Hoti”, tha ai.

Tutje, siç u shpreh Konjufca, meqenëse po shihet se marrëveshja në fjalë nuk ka mbështetje, atëherë duhet rikthyet në fokus rrëzimi i qeverisë.

“Meqenëse këtë marrëveshje po e përkrah vetëm gjysma e LDK-së dhe gjysma e Nismës atëherë është moment i mirë që ta rikthejmë mocionin e mosbesimit. Nëse kjo qeveri vazhdon me këtë avaz edhe në Bruksel, do të vijnë kompromise edhe më të dëmshme”, tha ai.

Sipas tij, nëse arrihet pajtueshmëri, atëherë rrëzimi i qeverisë është i mundshëm.

“Është koha që edhe PDK-ja dhe AAK-ja të reflektojnë pasi që vetëm nuk po pajtohen me këtë marrëveshje, që t’i bashkojmë nënshkrimet tona. Nëse iniciativës tonë i bashkohet AAK dhe PDK, atëherë mendoj që votat janë të mjaftueshme që kjo qeveri të dërgohet në shtëpi”, tha Konjufca.