Richard Grenell, emisari i presidentit amerikan, Donald Trump ka bërë të ditur se liderët e Kosovës dhe Serbisë do të takohen në Uashington më 2 shtator për bisedime.

Grenell këtë e ka bërë të ditur përmes një cicërime në Twitter sot në mëngjes.

“Ne jemi të lumtur të njoftojmë se liderët e Kosovës dhe të Serbisë do të takohen në Shtëpinë e Bardhë, më 2 shtator për të biseduar”, ka shkruar ambasadori Grenell.

Ndryshe, një takim në Uashington ishte i paraparë në mes krerëve të Kosovës e Serbisë për 27 qershor, por ishte anuluar pas aktakuzës ndaj presidentit Hashim Thaçi nga Gjykata Speciale. /Arbresh.info/

https://twitter.com/RichardGrenell/status/1294088022204407808

Ndërkohë, më 16 korrik, kryeministri i Kosovës Avdullah Hoti dhe presidenti i Serbisë, Aleksandër Vuçiç zhvilluan takimin e parë pas 20 muajsh të ndërmjetësuar nga Bashkimi Evropian. Të dy udhëheqësit diskutuan për çështjen e personave të zhdukur gjatë luftës, zhvillimin ekonomik dhe me pajtimin që të vazhdojnë bisedimet në shtator.

Gjatë një vizite kohët e fundit në Uashington, bashkërenduesi i Kosovës për bisedimet me Serbinë, Skënder Hyseni tha për Zërin e Amerikës se Prishtina e sheh rolin e SHBA në dialogun Kosovë-Serbi si të pazëvendësueshëm dhe se kishte marrë angazhimin e Uashingtonit në këtë drejtim.

Ai tha se dialogu me Serbinë duhet të marrë një dinamikë të re dhe duhet të kulmojë me njohje reciproke./Arbresh.info/