Ministri i Punëve të Brendshme, Agim Veliu ka bërë të ditur se abshkë me zëvendësin e tij në ministri, Milan Radojevic dhe me drejtorin e Policisë së Kosovës kanë vizituar sot Komunën e Zubin Potokut, Stacionin Policor në këtë komunë, si dhe pikën kufitare në Bërnjak

“Me këtë rast u njoftova për së afërmi me punën dhe aktivitetet e këtyre institucioneve, sfidat dhe problemet me të cilat ballafaqohet Komuna e Zubin Potokut, zyrtarët policorë në këtë komunë, si dhe policët dhe zyrtarët tjerë kufitar, në veçanti gjatë kësaj kohe të menaxhimit të pandemisë COVID-19.

Me Kryetarin e Komunës së Zubin Potokut, Srdjan Vulovic biseduam mbi thellimin e bashkëpunimit të kësaj komune me Ministrinë e Punëve të Brendshme dhe institucionet shtetërore në përgjithësi, e në veçanti për nevojën e përforcimit të bashkëpunimit dhe të besimit të qytetarëve të kësaj komune në institucionet tona”, ka shkruar Veliu.

Ai ka bërë të ditur se është takuar edhe me komandantin e stacionit policor, Zvezdan Milivojevic që kërkoi që t’u mundësohet ndërtimi i stacionit të ri policor në këtë komunë.

“Ndërkaq, në pikën kufitare të Bërnjakut, u njoftuam nga afër me punën që po bëjnë policët kufitar dhe doganierët në qarkullimin e mallrave dhe njerëzve mes dy shteteve, Kosovës dhe Serbisë, por edhe në zbatimin e rregullave të pandemisë, ashtu si në të gjitha pikat tjera kufitare”, ka shkruar ai.

https://www.facebook.com/AgimVeliu/posts/1718517778295236