Katër të dyshuar janë arrestuar për vrasjen e L.B., 17 vjeçari në Prishtinë, i cili dje ka vdekur në QKUK.

Këtë e ka konfirmuar për KOHA-n, zëdhënësja e Policisë së Kosovës, Flora Ahmeti.

Ajo thotë se drejtoria Rajonale e Policisë në Prishtinë, respektivisht njësiti për Hetime të Përgjithshme ka realizuar një operacion që ka rezultuar me arrestimin e katër personave të dyshuar për rastin e vrasjes së rëndë që ka ndodhur dje në Prishtinë.

Ahmeti bën të ditur se personat e dyshuar janë:

E. I, mashkull, 19 vjeç, shtetas i Republikës së Kosovës dhe

E.M , mashkull, 19 vjeç, shtetas i Republikës së Kosovës, dyshohet të kenë kryer veprën vrasje e rëndë, ndërsa:

P. I, mashkull, 18 vjeç, shtetas i Republikës së Kosovës dhe

L.B, mashkull, 20 vjeç, shtetas i Republikës së Kosovës, ngarkohen me veprën, dhënie e ndihmës kryerësve pas kryerjes së veprës penale.

“Katër personat e dyshuar janë intervistuar nga ana e hetuesve të Njësisë së Hetimeve të Përgjithshme dhe pas intervistimit me aktvendim të prokurorit janë dërguar në qendrën e mbajtjes. Njësiti i hetimeve ka arritë të gjejë dhe sekuestrojë një armë, një skuter dhe disa prova të tjera që mund të shërbejnë në dokumentimin e rastit”, ka thënë Ahmeti.

Kujtojmë se viktima ishte plagosur në lagjen Arbëria në Prishtinë, për të vdekur më pas në QKUK nga plagët e marra.