Nënkryetari i PDK-së, Hajredin Kuçi, ndërsa ka folur për bashkëqeverisjen mes VV-së e LDK-së ka thënë se mbetet të shihet se si do ta konsolidojnë shtetin e Kosovës nga brenda dhe jashtë, pasi janë parti konkurrente dhe të tilla do të jenë edhe në zgjedhjet e ardhshme.

Ai ka thënë se partia e tij do të jetë një opozitë e fortë dhe do të reagojë sa herë që të ketë gabime nga qeverisja apo të bëhen gjëra të cilat nuk janë në të mirë të vendit.

I pyetur për gjuajtjen e mundshme të gazit lotsjellës, Kuçi ka thënë se ai së paku nuk bën një veprim të tillë.

“Së paku prej meje, nuk jam prej tyre që e bëjë, e lus PDK-në të mos e imitojë VV-në”, ka thënë Kuçi në emisionin n’Konak.

Kuçi ndërsa ka folur për marrëveshjen finale me Serbinë, ka paralajmëruar një kompromis të ri.

“Kosovën po e pret një kompromis i ri, çdo ditë që shtyhet marrëveshja për Kosovën do të jetë më i vështirë. Tash duhet të ruajmë kornizën e funksionalizmit të shtetit, që s’do të jetë i lehtë, dhe SHBA dhe BE nuk besoj që do të jenë rrënues të shtetit të Kosovës. Duhet të jemi të kujdesshëm në partneritet me SHBA-në na sjell benifite, në të kundërtën nuk kemi fuqi t’i kundërshtojmë”, ka deklaruar Kuçi.

Ndërsa ka folur për “shkëmbimin e territoreve”, Kuçi ka thënë se presidenti Thaçi kurrë nuk tradhton për vendin, por as të tjerët.

Kuçi thotë se Thaçi dhe qeveria e re dhe akterë tjerë në Kosovë duhet të ulen të bisedojnë dhe të dalin me një qëndrim.