Ish-zyrtarja operative e Agjencisë Kosovare të Inteligjencës (AKI), Vlora Hyseni, është emëruar si zëvendësdrejtore e përgjithshme në AKI që nga shkurti i vitit të kaluar.

Megjithatë, edhe pse emërimi i saj në këtë pozitë është bërë para një viti, emri i saj ende nuk figuron në faqen zyrtare të AKI-së.

Të dhënat e krerëve të kësaj agjencie, janë freskuar në nëntor të vitit 2019, kur në krye të AKI-së erdhi Kreshnik Gashi dhe Inspektori i Përgjithshëm, Burim Ramadani, mirëpo emri i zëvendësdrejtoreshës Vlora Hyseni nuk figuron askund.

Vendimi për emërimin e saj në këtë post kishte hyrë në fuqi nga data 27 shkurt 2019, dhe i ishte dërguar Komisionit për Mbikëqyrjen e AKI-së në Kuvendin e Kosovës.

Por, në Agjencinë Kosovare të Inteligjencës, arsyetohen se ka të bëjë me ndonjë problem teknik.

“Lidhur me zëvendësdrejtoren e AKI. Ju njoftojmë se znj. Vlora HYSENI është zëvendësdrejtore e AKI,  mosparaqitja e emrit të znj. Hyseni në Webfaqen e AKI, me siguri ka të bëjë me ndonjë problem teknik”, thuhet në përgjigjen e kësaj zyre për arbresh.info.

Njohësi i çështjeve të sigurisë, Bedri Elezi, e cilëson si “interesante” historinë e emërimeve dhe dorëheqjeve në AKI.

“Deri më tani nuk kemi pasur asnjë  opinion të mirëfilltë të kryemistrave dhe presidentëve për emërimin apo shkarkimin  e drejtoreve zv drejtoreve apo edhe inspektorit te përgjithshëm të AKI”, vlerëson Elezi./ E.Ballazhi/arbresh.info/