Kryetari i Federatës së Futbollit të Kosovës, Fadil Vokrri, ka thënë në Info Magazine të Klan Kosovës se, lojtarët e kombëtares shqiptare janë heronj dhe nuk ka kurrfarë epiteti tjetër për ata.

“Pas 70 viteve që FSHF është e pranuar në instanca ndërkombëtare, është kjo hera e parë që kualifikohet në Evropian apo Botëror, nuk ka epitet tjetër përpos të quhen këta lojtarë heronj, bile edhe kjo është pak për ta”.

Vokrri deklaroi se lojtarët e kombëtares përkundër zhgënjimit në humbjen kundër Serbisë, u kthyen për vetëm tre ditë dhe u kualifikuan, duke treguar fuqi shumë më të madhe.

“Pas një zhgënjimi që patëm 3 ditë më herët, kombëtarja shqiptare mblodhi forcë të përgatitet në ato 3 ditë, herë-herë pati edhe kritika nga simpatizuesit”.

“Pas shënimit të dy golave u krijua një siguri dhe pjesa pas 2:0 ishte një rutinë dhe stafi teknik dhe lojtarët me përpikëri i kanë zbatuar detyrat”.