Kultivimi i karkalecit të detit po rritet shpejt në qytetin perëndimor venezuelas, Maracaibo, por një pjesë e vogël e këtij ushqimi do të përfundojë në tryezat e këtij populli që po vuan nga kequshqyerja.

Rreth 90 për qind e këtyre karkalecave të detit do të eksportohen në Evropë dhe Azi. Kjo gjë po bëhet me bekimin e presidentit Nicolas Maduro.

Lideri i Venezuelës ka thënë se eksportimi i ushqimit është një rrugë e mirë për ta stabilizuar ekonominë, e cila është në krizë. Ai po e shtron rrugën për rritje të eksportit të ushqimit jashtë vendit pasi i ka zbutur masat për tregti të jashtme.

Përpos ushqimeve të detit, edhe djathi, avokadoja dhe sheqerkat e Venezuelës po gjejnë blerës të huaj.

Megjithatë, këto shitje nuk janë të mëdha. Shumica e kompanive ushqimore në vit shesin mallra që vlejnë më pak se 1 milion dollarë. Vendi vazhdon  të mbetet i varur nga shitja e naftës, e cila vitin e kaluar e arriti vlerën e 29 miliardë dollarëve.

Ndonëse në treg tash ka më shumë prodhime, pak njerëz kanë mundësi t’i blejnë ato. Në krahasim me pesë vjet më parë, numri mesatar i kalorive që i konsumon një banor i Venezuelës ka rënë në 1600. Ky numër është shumë më i vogël se sasia prej 2000 deri 2500 kalorish, e rekomanduar nga Organizata Botërore e Shëndetësisë, shkruan “Reuters”, transmeton Gazeta Express.