Portugalia u bë Kombëtarja e parë që e arrin finalen e Ligës së Kombeve, mirëpo të gjithë vëmendja e të gjithëve mbeti te paraqitja individuale e Cristiano Ronaldos, që shënoi het-trik në këtë ndeshjes.

Në një moment të ndeshjes, Kevin Mbabu i Zvicrës e kuptoi se çfarë do të thotë të përballesh me kapitenin e Portugalisë, pasi që ai mbeti i shtrirë në tokë pas një driblimi të Cristiano Ronaldos, transmeton Gazeta Express.

Ronaldo shkëlqeu duke i shënuar tri gola ndaj Zvicrës së Xherdan Shaqirit dhe Granit Xhakës në gjysmëfinalen e zhvilluar të mërkurën mbrëma në Porto, dhe e bëri Portugalinë kombëtaren e parë finaliste në garën e re të UEFA-s.

Zvicra, për të cilën dy shqiptarët Shaqiri dhe Xhaka luajtën 90 minuta, do të luajë për vendin e tretë të dielën. Ndërsa, Portugalia do ta presë fituesin e gjysmëfinales së dytë mes Holandës dhe Anglisë, në finalen e së dielës.

Një pjesë të parë të kontrolluar nga vizitorët, e fitoi Portugalia falë Ronaldos. Superylli i Juventusit realizoi një gol fantastik nga gjuajtja e lirë në minutën e 25-të.

Zvicra, megjithatë, pati një fillim premtues në pjesën e dytë dhe e barazoi rezultatin në 1:1. Mbrojtësi Rodrigo Rodriguez shënoi nga penalltia, e cila erdhi vetëm falë VAR-it në minutën e 57-të.

https://twitter.com/FootyHumour/status/1136374137780391937?ref_src=twsrc%5Etfw%7Ctwcamp%5Etweetembed%7Ctwterm%5E1136374137780391937&ref_url=https%3A%2F%2Fwww.gazetaexpress.com%2Fmomenti-kur-ronaldo-e-turperoi-mbrojtesin-e-zvicres%2F

Në një kohë kur u mendua se koha shtesë apo penalltitë do ta vendosnin finalistin e parë, Ronaldo doli në skenë si gjithmonë.

Dy minuta para fundit, Ronaldo e ktheu epërsinë e portugezëve duke realizuar pas një super pasimi nga Bernardo Silva. Vetëm dy minuta më vonë, një top i humbur nga Xhaka në mesfushë e fundosi Zvicrën.

Portugalia doli në kundërsulm të shpejtë, të cilin e konkretizoi me gol Ronaldo, i cili e kompletoi het-trikun duke shënuar një gol të bukur.