Kryetari i Partisë Demokratike, Lulzim Basha i është përgjigjur letrës së pestë të dërguar në adresë të këtij të fundit nga kryeministri Edi Rama lidhur me mundësinë e uljes në tryezën e dialogut midis palëve politike në vend.

Me anë të një postimi në Facebook, Basha shprehet se shqiptarët janë popull i Europës, i lirisë dhe demokracisë që sipas tij beson në vlera dinjitet dhe atdhe sipas të cilit nuk i japin dhe as nuk i dorëzojnë.

“Beteja për to është misioni më i madh dhe më fisnik i njeriut të lirë. Beteja me të keqen, po e çliron dhe fisnikëron shoqërinë dhe kombin tone”, shkruan Basha duke shtuar se opozita nuk do të bëjë asnjë hap pas.

Reagimi i plotë:

Ne jemi Populli i Europës, ne jemi Populli i Lirisë, ne jemi Populli i Demokracisë. Ne jemi njerëz që besojmë në vlera, besojmë tek dinjiteti i njeriut, besojmë tek familja, besojmë tek atdheu.

Demokracinë nuk e japim, të drejtat dhe liritë tona nuk i dorëzojmë. Beteja për to është misioni më i madh dhe më fisnik i njeriut të lirë. Beteja me të keqen, po e çliron dhe fisnikëron shoqërisë dhe kombit tonë.

Forca jonë është bashkimi, forca jonë është qëndresa, forca jonë është përballja deri në fitoren e kësaj beteje për Shqipërinë si gjithë Europa. Asnjë hap pas! #ShqipëriaSiEuropa

Ditën e sotme, kryeministri Edi Rama i ka dërguar letrën e pestë publike kryedemokratit, Lulzim Bashës të cilën e nis me një përgëzim për protestën e mbrëmshme duke e cilësuar si një hap domethënës mbrapa.

Më tej, Rama shkruan se me afrimin e ditës së zgjedhjeve po konsumohet edhe koha për mundësinë e dialogut, duke shtuar se përveç të tjerave sipas tij, shpresa vdes e fundit dhe është i hapur për t’u ulur në një tryezë të përbashkët.

Duke iu drejtuar kundërshtarit të tij politik me fjalët se, me djegien e mandateve opozita nuk e ka penguar dot punën e parlamentit dhe atë të qeverisë si dhe largimin e tij nga drejtimi i qeverise, shprehet se edhe nëse opozita nuk ulet në tryezën e dialogut, mazhoranca do te nis fushatën elektorale.

“Do t’i marrim bashkitë e braktisura prej jush se meqë i latë ju, s’mund t’i lemë edhe ne rrugëve dhe do të vazhdojmë të qeverisim, me të gjitha bateritë e karikuara për katër vjet, deri në qershorin 2021”, shkruan Rama ndër të tjera.