LSDM: Në vend që të flasin për moral, deputetët e akuzuar të OBRM-PDUKM-së të japin dorëheqje

13:36 | 24 Maj 2019
A. B.

Partia maqedonase në pushtet LSDM, përmes një kumtese ju është përgjigjur akuzave të OBRM-PDUKM-së, të cilët përveç dorëheqjes së Pavle Bogoevskit, kërkuan përgjegjësi penale edhe nga funksionarët tjerë qeveritar.

Nga LSDM thonë se OBRM-PDUKM-ja është parti simbol e krimit, korrupsionit dhe keqpërdorimeve, përcjell Telegrafi Maqedoni.

“Pavle Bogoevski tregoi përgjegjësi morale të lartë para qytetarëve, vlerë me të cilën OBRM-PDUKM-ja nuk është njohur. Dorëheqja e deputetit Bogoevski për arsye morale hap një çështje të rëndësishme: A do të japin dorëheqje deputetët e OBRM-PDUKM-së të cilët janë të akuzuar në procese gjyqësore?”, thonë nga LSDM.

Ata në fund shtojnë se në vend të dyfytyrësisë për të folur për moral, deputetët e OBRM-PDUKM-së duhet të ndalojnë së mbrojturi Nikolla Gruevskin.