Tetë ushtarë u vranë të shtunën gjatë një sulmi në një kamp trajnimi që i përket forcave të armatosura libiane të gjeneralit Khalifa Haftar në qytetin jugor të Sebhas. Lajmin e bënë të ditur autoritetet lokale të këtij qyteti.

Kryetari i këtij qyteti, Hamed al-Khaiyali, njoftoi se një ushtari i është hequr koka, ndërsa të tjerët janë masakruar ose janë qëlluar me armë zjarri.

Një burim në Ushtrinë Kombëtare Libiane të Haftarit i fajësoi Shtetin Islamik dhe luftëtarët e Çadit për këtë sulm.

Sebha dhe fushat e naftës që ndodhen përreth saj kontrollohen nga forcat e gjeneralit Haftar, por shumë trupa kanë shkuar në veri për shkak të ofensivës njëmujore në kryeqytetin e Libisë, Tripoli, i cili kontrollohet nga qeveria e njohur nga komuniteti ndërkombëtar.

Ushtria Kombëtare Libiane ka hasur në rezistencën e fortë të grupit etnik të Tebus gjatë fushatës në jug të vendit në fillim të këtij viti.

Militantët e Shtetit Islamik janë gjithashtu aktivë në jug të Libisë, ku kanë kryer disa sulme muajve të fundit. Ata u vendosën në jug pasi e humbën kontrollin në qytetin e Sirtes në dhjetor të vitit 2016, shkruan “Reuters”, transmeton Gazeta Express.