Vetaksidentohet vetura në Mitrovicë, pasagjerja lëndohet rëndë

21:53 | 21 Shtator 2015
M. A.

Një aksident i rëndë komunikacioni ka ndodhur në fshatin Frashër të Mitrovicës, me ç’rast një veturë është vet aksidentuar.

Siç shihet në fotot e bëra nga Veriu.info, vetura është rrokullisur rreth 15 metra larg rrugës, duke përfunduar e përmbysur.

Si pasojë e aksidentit janë lënduar drejtuesi i veturës, por edhe pasagjerja e tij, e cila ka mbetur e shtrirë për disa minuta derisa ka arritur autoambulanca.

Avni Zahiti, zëdhënës i policisë për rajonin e Mitrovicës, në një prononcim për Veriu.info, e ka konfirmuar aksidentin, duke treguar se drejtuesi i veturës e ka humbur kontrollin në timon.

“Një veturë, drejtuesi i së cilës e ka humbur kontrollin, ka dalë nga rruga, ku për pasojë drejtuesi dhe pasagjeri kanë pësuar lëndime. Gjendja e tyre është jashtë rrezikut për jetë”, ka thënë Zahiti.

Ai ka bërë të ditur se rasti është evidentuar si aksident me lëndime.