Duke folur për situatën aktuale politike në vend, për krizën opozitë-qeveri, Sekretarja e Përgjithshme e PDIU-së, Mesila Doda, ish-deputete në Kuvendin e Shqipërisë me partinë e çamëve pasi u largua nga Partia Demokratike, thotë se në Shqipëri ka rënë sistemi.

Për të mbështetur këtë tezë të sajën, ajo tha se kjo gjë ka ndodhur që kur deputetët e opozitës vendosën të djegin mandatet dhe të dalin nga Kuvendi, ku përfaqësonin popullin, një parlament që opozita e cilëson ilegjitim, të dalë nga zgjedhje me vota të blera, për më tepër me paratë e krimit.

Por, këtu ndërhyri sërish Alfred Peza, i cili tha se sistemi nuk ka rënë aspak, madje është në këmbë dhe çdo gjë funksionon më së miri, por siç theksoi ai disa herë, “opozita preu degën e pemës mbi të cilën qëndronte vet”.

Peza shpjegoi më tej se Shqipëria është Republikë Parlamentare dhe si e tillë, në Kuvend shkojnë përfaqësuesit e popullit. Shumicën e cakton populli dhe shumica është ende atje, ndërkohë që një pakicë ka vendosur të largohet, në mungesë të vizionit dhe programit për t’iu ofruar shqiptarëve një alternativë më të mirë.