Italia kërkon që fëmijët të jenë të vaksinuar, në të kundërt, nuk marrin pjesë dot në mësim. Lëvizja e ekzekutivit italian pason muaj të tërë debati kombëtar mbi vaksinimin e detyrueshëm.

Tani, prindërit rrezikojnë gjobitjen me deri në 500 euro nëse i dërgojnë fëmijët në shkollë të pavaksinuar. Ligji i ri erdhi në mesin e shpërthimit të epidemisë së fruthit, dhe zyrtarët italianë thonë se niveli i vaksinimit është përmirësuar me hyrjen e tij në fuqi.

I mbiquajturi “ligji Lorenzin”, sipas ish-ministrit të shëndetësisë qe e prezantoi, kërkon një nivel të detyrueshëm imunizimi për fëmijët përpara se të shkojnë në shkolle, ku përfshihen vaksinat kundër lisë së dhenve, poliomelitit, shytave, fruthit dhe rubeolës.
Fëmijët deri në 6 vjeç mund të përjashtohen automatikisht nga kopshti apo programet parashkollore nëse nuk paraqiten prova të vaksinimit të tyre; ndërsa atyre nga 6 deri në 16 vjeç nuk u ndalohet dot pjesëmarrja në mësim, por prindërit përballen me gjoba të forta nëse nuk kryhet imunizimi.

Kundërshtimet megjithatë nuk mungojnë. Nëna e një vajze 12 vjeçe, e cila nuk është vaksinuar asnjëherë dhe qe prej lindjes është kuruar vetëm përmes homeopatisë, tha për “Corriere della Sera” se do ta kundërshtojë ligjërisht vendimin, ndërsa pretendon se mjeket e marrin shtysën nga arsyet që u japin depot farmaceutike./tch