Avionët e forcave ajrore australiane kanë përfunduar misionin e tyre të parë në Siri gjatë natës, njoftoi sot Departamenti australian i Mbrojtjes.

Sulmet u kryen vetëm tri ditë pasi qeveria australiane ra dakord për një kërkesë të SHBA-së për t’u bashkuar me forcat e koalicionit për bombardimin e bazave të Shtetit Islamik brenda Sirisë.

Dy avionë australianë të forcave ajrore, tip F/A-18 Hornets dhe një avion komandues E-7A u përfshinë në mision.

Kryeministri australian, Tony Abbott i tha sot partisë së tij se Australia është përgjigjur me forcë ndaj kërcënimit që vjen nga Shteti Islamik.

Forcat e koalicionit, që kaluan kufirin për në Siri për të goditur bazat e ISIS, përfshinin SHBA-të, Kanadanë, Jordaninë, Bahreinin, Arabinë Saudite dhe Emiratet e Bashkuara Arabe. Franca dhe Britania e Madhe pritet gjithashtu të kryejnë sulme brenda Sirisë.