Çdo vit mijëra persona heqin dorë nga shtetësia e Kosovës. Gjatë tërë vitit 2018 shtetësinë e lanë gjithsej pesë mijë e 464 qytetarë. Këta qytetarë e lanë pasaportën kosovare për të jetuar në shtetet e BE-së që nuk e lejojnë nënshtetësinë e dyfishtë.

Për pesë vitet e fundit janë mbi 30 mijë qytetarë që kanë zgjedhur një pasaportë të huaj në vend të asaj të shtetit të tyre.

Shumë kosovarë jetën po e shohin jashtë kufijve të shtetit të tyre. Këtë e vërtetojnë mijëra kërkesa të qytetarëve në Ministrinë e Punëve të Brendshme ku kërkojnë të heqin dorë nga shtetësia. Qytetarët po fillojnë jetesën e re kryesisht në Gjermani, Austri, Slloveni, Mal të Zi etj.

Në statistikat e MPB-së dërguar Gazetës Express, thuhet se gjatë vitit 2018 nga shtetësia kosovare u liruan gjithsej 5464. Nga kjo shifër janë 4719 qytetarë që kanë vazhduar jetesën në Gjermani, 508 qytetarë në Austri, 75 qytetarë në Slloveni etj.

Shkalla e lartë e emigracionit po ndodhë për shkak të keq udhëheqjes së vendit. Kjo klasë politike arriti t’ia vjedhë edhe shpresën e fundit qytetarit të saj se në këtë vend mund të ketë progres, thekson sociologu Besim Gollopeni.

“Tek e para kemi faktorët shtytës pra, gjendjen e vështirë sociale dhe ekonomike ku, në mungesë të gjetjes së një vendi pune, punë e pasigurt, mungesë sigurimi në punë, mungesë e një shëndetësie apo sistemi shëndetësor të kohës, shkalla e lartë e korrupsionit dhe krimit të organizuar, sistem i brishtë i drejtësisë ,etj”, tha Gollopeni për Express.

Po ashtu MPB tha se gjatë vitit 2018 shtetësinë kosovare e kanë fituar 349 qytetarë të nacionaliteteve të huaja.