Besimtarët e krishterë po festojnë lindjen e Krishtit. Në katedralen e Shën Palit, këtu në Tiranë, besimtarët katolikë janë mbledhur për meshën e mesnatës, kurse të krishterët ortodoksë do të luten në orët e para të paradites.

Me rastin e Krishtlindjeve, klerikët e lartë të krishterë kanë dhënë mesazhet e tyre, jo vetëm për besimtarët, ndërsa Top Channel transmetoi pamje direkte nga mesha e Krishtlindjes në Shkodër dhe në Tiranë.

“Çdo njeri duhet të jetojë në paqe, në shtëpi e kudo, në Shqipëri e në botë. Njerëzit duhet të hapin zemrën për paqe në këtë natë të rëndësishme”, u shpreh Imzot Anxhelo Masafra.

Krishtlindja është një festë me orgjinë romake që festohet çdo vit në natën mes datës 24 dhe 25 dhjetor dhe përgjatë tërë datës 25.

Narrativa tradicionale e Krishtlindjeve, që përshkruhet në Testamentin e Ri, thotë se profecia parashikoi lindjen e Jezusit në një stallë në Betlehem, si biri i Jozefit dhe Marias.

Në fakt dita dhe muaji i lindjes së Krishtit nuk dihen, por rreth shekullit të katërt kisha perëndimore zgjodhi datën 25 dhjetor, si një simbolikë për të përkujtuar ardhjen e Zotit në tokë në formën e njeriut, për të shlyer mëkatet e njerëzve.

Gjithsesi sot festa e Krishtlindjeve është zhveshur shumë nga simbolika thjesht fetare dhe në shumë vende, përfshirë Shqipërinë që doli nga një periudhë e gjatë ateizmi shtetëror, Krishtlindja festohet nga të tërë dhe është ditë pushimi zyrtare, ku familjet bashkë mblidhen përreth një dreke festive, për të shkëmbyer dhurata.