Afaristi i njohur kosovar, që jeton dhe vepron në Zvicër, Jakup Shabani, ka marrë postin e kryetarit të klubit të volejbollit “Drita”.

Delegatët e Kuvendit të KV Drita, në një mbledhje të jashtëzakonshme me votën unanime kanë votuar që Jakup Shabani të zgjidhet kryetar i KV Drita.

Skuadra kampione në fuqi e ka marrë lajmin më të mirë, në periudhën kur më së shumti kjo I është dashur, meqë përkundër sukseseve të deritashme, i ka munguar tretmani që e meritonte ky klub.

Në kuvendin zgjedhor të mbajtur të premten në Gjilan, kuvendarët ia kanë dhënë mandatin e presidentit biznesmenit të njohur Jakup Shabani, I cili ka shprehur gatishmërinë të kthehet e të kontribuojë për klubet e vendit të origjinës së tij.

Shabani pasi është votuar nga delegatët është zotuar se së bashku me gjithë volejboll-dashësit do të mundohet të bëjë më të mirën për Dritën dhe që këtij qytetit të vazhdojë ti sjellë trofe e krenari.

Lajmin për zgjedhjen e Shabanit president e ka mirëpritur edhe trajneri i KV Drita Lorik Ilazi, i cili në fjalën e tij e ka falënderuar afaristin kosovar dhe të njëjtën kohë është zotuar që të rrisë nivelin e paraqitjeve të Dritës si në garat vendore ashtu edhe në ato ndërkombëtare.