Presidenti i Turqisë, Recep Tayyip Erdoğan para samitit katërpalësh për Sirinë që do të mbahet nën mikpritjen e tij në Stamboll, priti në takime të ndara kancelaren gjermane Angela Merkel, presidentin e Rusisë Vladimir Putin dhe presidentin e Francës Emmanuel Macron, raporton Anadolu Agency (AA).

– Merkel, Putin dhe Macron arrijnë në Stamboll për samitin katërpalësh.

Takimi i parë në Rezidencën Vahdettin në Stamboll u zhvillua me kancelaren gjermane Angela Merkel, ku të pranishëm ishin edhe ministri i Punëve të Jashtme të Turqisë, Mevlüt Çavuşoğlu dhe ministri i Thesarit dhe Financave të Turqisë, Berat Albayrak.

Takimi i cili ishte i mbyllur për media zgjati rreth gjysmë ore.

Më pas presidenti Erdoğan priti në takim homologun e tij rus Vladimir Putin. Në takim morën pjesë edhe ministri i Jashtëm i Turqisë, Çavuşoğlu, ministri i Mbrojtjes Kombëtare, Hulusi Akar dhe ministri i Thesarit dhe Financave, Albayrak. Ndërsa nga pala ruse në takim të pranishëm ishin ministri i Mbrojtjes, Sergey Shoygu, ministri i Jashtëm Sergey Lavrov dhe këshilltari i presidentit rus, Yuri Ushakov.

Edhe ky takim i cili zgjati rreth 45 minuta ishte i mbyllur për media.

Ndërkaq në Rezidencën Vahdettin së fundmi ka arritur edhe presidenti i Francës Emanuel Macron, i cili po ashtu u prit nga presidenti Erdoğan para samitit katërpalësh. Takimi zgjati rreth gjysëm ore.