Gur themeli i Xhamisë Qendrore në Prishtinë ka një mesazh.
Mirëpo, përkundër kësaj, ka tri ditë që me investimin turk, kanë filluar punimet për ndërtimin e xhamisë.

Kjo është zona ku, sipas projektit të kompanisë turke “KOMAS” dhe Bashkësisë Islame do të ndërtohet xhamia. Për këtë, BIK-u ende nuk ka marrë leje nga komuna e Prishtinës.

Mirëpo, në parkingun e Postës dhe Telekomit të Kosovës, shihen makineritë që kanë filluar të punojnë.

Për T7 nga Komuna e Prishtinës thonë që kjo i lejohet BIK-ut edhe pse nuk ka marrë leje.

“Bashkësia Islame e Kosovës (BIK) ka më shumë se një vit që i ka marr kushtet ndërtimore, dhe sivjet ka aplikuar për vazhdimin e afatit të tyre. Kur pala i merr kushtet ndërtimore nga Komuna, mund ta bëjë rrethimin e punishtes, heqjen e shkurreve, e të ngjashme. Zhvillimet aktuale në terren, janë në kuadër të kësaj. Përndryshe, BIK ende nuk ka aplikuar për leje të ndërtimit”

E nga ana e BIK-ut nuk është caktuar ende një datë e saktë se kur do të fillojnë punimet.

“Është duke u bërë parapërgatitja e terrenit, po bëhet rrethoja. Njëherë nuk janë të parapara të fillojnë ndërtimet, janë duke u bërë vetëm disa punë teknike, por nuk kam ndonjë datë së kur do të fillojë ndërtimi.”

Temë diskutimi, për ndërtimin e Xhamisë Qendrore është bërë edhe lokacioni. Fillimisht ishte paraparë që të ndërtohet në Kampusin Universitar, mirëpo gur themeli u vendos pranë PTK-së, në 2012.

Këtë lokacion ka qytetarë që nuk e shohin si të duhurin për ndërtimin e një xhamie.

“Nuk mendoj që duhet me u ndërtu xhamia në qendër. Xhamia duhet me u ndërtu, por vendi nuk është i duhuri.”

Mirëpo, ka edhe nga ata që ndërtimi i Xhamisë Qendrore pranë Postës së Kosovës është në rregull.

“Ka nevojë për me u ndërtu xhamia këtu, xhemati diçka…”

“Është ma afër njerëzve…”

Përveç lokacionit, kundërshtime ka pasur edhe për arkitekturën e ndërtimit të xhamisë. Vitin e kaluar, në drejtim të Komunës së Prishtinës dhe Bashkësisë Islame kishte shkuar një letër nga Yll Rugova, tash drejtor i kulturës në këtë komunë.

“Objekti i përzgjedhur nga Bashkësia Islame e Kosovës ka stil arkitektonik tërësisht në kundërshim me kontekstin dhe ambientin përreth të lagjes për shkak se është projekt me stil arkitektonit të shekullit XV dhe XVI, përdersia objektet përreth i takojnë stilit modernist utilitarian të arkitekturës. Objekti poashtu nuk e përmbush kriterin e “origjinalitetit arkitektonik” të përshkruar në faqen 54 të konkursit, përderisa ndërtesa në fjalë është kopje e një ndërtese tjetër në shtet tjetër”

Ditë më parë, kundër kësaj ka dal edhe deputeti i PSD-së, Dardan Sejdiu. Në një koment në rrjetin social Facebook, deputeti ka thënë se është i gatshëm të japë 100 euro për ndërtimin e Xhamisë Qendrore sipas projektit të Zaha Hadid.

Projekti për ndërtimin e Xhamisë Qendrore në Prishtinë kishte filluar në shkurt të vitit 2012, mirëpo deri tani ende nuk kanë filluar punimet për ndërtimin e saj.