Kosova ka arritur fitoren e parë në Ligën e Kombeve duke i mundur Ishujt Faroe me rezultat 2-0. Arbër Zeneli dhe Atdhe Nuhiu realizuan për ‘Dardanët’ në ndeshjen e zhvilluar në stadiumin ‘Fadil Vokrri’ në Prishtinë.

Kosova me fitoren e së hënës ka kaluar e para në grup.Trajneri më i suksesshëm në historinë e futbollit kosovar, Afrim Tovërlani, vlerëson se pikët në këtë ndeshje për Kosovën kanë qenë  shumë të rëndësishme.

“Pikët kishin shumë rëndësi dhe fitorja e parë në stadiumin ‘Fadil Vokrri’ për ngritje të optimizmit për ndeshjet tjera. Sa i përket ndeshjes, mendoj se pjesa e parë nuk ishte e mirë dhe luajtëm pa arsye, me krosime të larta dhe shumë herë të kota. Pjesa e dytë ishte shumë më e mirë dhe ashtu është dashur që të luhet nga fillimi, të luhet me topin poshtë në tokë dhe me shumë lëvizje pa topin. Ajo që nuk me pëlqeu është nënçmimi i kundërshtarit pas avantazhit prej 2:0.

Normalisht që duhet të tentohet që të mposhtet kundërshtari, por nuk është në rregull dhe sportive që të nënçmohet”, ka thënë  Afrim Tovërlani për Insporti.com.

‘Toki’ ndër të tjera e kujton edhe ndeshjen kur Kosova është mundur nga Kroacia me rezultat 6:1.“Mua nuk më kujtohet që kroatët edhe pse na kanë mposhtur thellë, nuk kanë dashur që të na nënçmojnë. Ato gjëra i bëjnë futbollistët e pa pjekur mendjemëdhenjtë. Përndryshe, gjithçka ishte mirë, por nuk duhet të fluturojmë pas një fitoreje ndaj një kundërshtari realisht të dobët. Edhe pa u pranuar Kosova e ka mposhtur ekipin këtë ekip. Nuk është ndonjë e arritur për të menduar se kemi mbërritur në nivele të larta”, theksoi Afrim Tovërlani.

Ai në këtë edicion po e drejton skuadrën e Ferizajt.