Sot në të gjitha institucionet shkollore të arsimit para universitar në Republikën e Kosovës fillon viti i ri shkollor 2018 – 2019.

Ministria e Arsimit, Shkencës dhe Teknologjisë ka njoftuar se tashmë janë bërë të gjitha përgaditjet e duhura për fillimin e mbarë të vitit të ri shkollorë.

Ministri i Arsimit , Shyqiri Bytyqi do të mbajë konferencë për media ku do të flasë në lidhje me përgatitjet për vitin e ri shkollor.

Ministri Bytyqi, po ashtu do të vizitojë shkollën fillore “Ibrahim Banushi”, në fshatin Shalë të Lipjanit, ku do të bëjë edhe shpërndarjen simbolike të Abetares.

Edhe Komuna e Prishtinës ka uruar të gjithë nxënësit dhe mësimdhënësit dhe ka theksuar se është angazhuar me të gjitha kapacitetet institucionale që të sigurojë kushte për fillimin e një viti të mbarë, në 73 institucione të niveleve të ndryshme shkollore, me 45400 fëmijë.

Në shumicën e institucioneve shkollore janë bërë investime të mëdha për përgatitjen e infrastrukturës shkollore.