(E plotësuar) Tre persona nga Ferizaj po mbahen nga policia nën dyshimin se kanë sulmuar dje rreth orës 10:00, në rrugën “Mic Sokoli” viktimën A.S (27 v.) ku ky i fundit së bashku me punëtorët e kompanisë së tij po pastronin një oborr që është pronë e tyre

Ata janë sulmuar fizikisht dhe janë kanosur nga ana e të dyshuarve: A.H. (41 vj.), E.H. (37 vj.) dhe L.H. (23 vj.).

Viktimat janë dërguar në Qendrën e Emergjencës të Ferizajt për trajtim mjekësor dhe të njëjtit posedojnë edhe raportet mjekësore.

Njësiti i Hetimeve të Stacionit Policor në Ferizaj, i ka arrestuar të dyshuarit.

Sipas raporteve të para të hetuesisë, të dyshuarit pretendojnë se prona të cilën e ka blerë viktima A.S. dhe vëllezërit e tij, duhet t’u takojë atyre (të dyshuarve), për shkak se kufizohet me pronat e tyre.

Me urdhër të prokurorit, të dyshuarit janë ndalur në Qendrën e Mbajtjes për 48 orë.