Mbledhja e Kuvendit të Komunës së Malishevës, përsëri sot i ka ndërprerë punimet në gjysmë, pasi anëtarët e Kuvendit të Komunës nga radhët e LVV dhe LDK, lëshuan mbledhjen, ndërsa PDK, ashtu siç kishin paralajmëruar, nuk morën pjesë fare në këtë mbledhje.

LVV dhe LDK, lëshuan mbledhjen, në shenjë pakënaqësie me mos miratimin e kërkesës së kryesuesit të KK të Malishevës, Rrahim Morina, për zgjerimin e hapësirës (zyre) së punës për kryesuesin e kuvendit.

Përndryshe, në mbledhjen e sotme, Kuvendi i Komunës së Malishevës, ka shqyrtuar disa nga pikat e parapara për këtë mbledhje dhe ka marrë disa vendime. Fillimisht, KK e ka miratuar fillimin e procedurave, përkatësisht e ka quar në debat publik draft Rregulloren për Tokat Bujqësore në Komunën e Malishevës.

Po ashtu në këtë mbledhje KK, mori vendim edhe për formimin e një komisioni për verifikimin e çështjes së banesave në lagjen Mirëdita në Malishevë.

Një vendim tjetër i KK të Malishevës në mbledhjen e sotme, ishte edhe vendimi për dhënien në shfrytëzim të pronës publike, për ndërtimin e një trafo për shpërndarjen e rrymës në fshatin Tërpezë.