Ka vazhduar sot dita e trete e grevës së minatorëve.

Ata thonë se janë të lodhur dhe të zhgënjyer që edhe pas tre ditësh grevë nuk ka ardhur askush nga zyrtarët e lartë institucionalë për t’i vizituar dhe për t’i dëgjuar kërkesat e tyre, me përjashtim të disa deputetëve.

Deputeti i cili vjen nga radhët e AKR-së, Islam Pacolli, ka shkuar për të parë nga afër gjendjen e minatorëve të Artanës të cilët kanë hyrë në ditën e tretë të grevës.

Deputeti Pacolli tha se është obligim moral nga ana e tij që të dëgjojë dhe të shoh prej së afërmi kërkesat e minatorëve, raporton Arbesh.info.

Ai për rreth një orë ka bashkëbiseduar dhe ka dëgjuar me vëmendje kërkesat e minatorëve.

Pacolli u premtoi atyre se është domosdoshmëri që investimet në minierën e Trepçës, në veçanti në njësit e saja të krahinës së Gollakut në Hajvali, Kishnicë e Artanë do të ndodhin shumë shpejt.

Ua kujtojmë se deputeti Islam Pacolli është fëmijë i një ish-minatori i cili i priu marshit të minatorëve në vitin 1988, e që shënon një nga aktet heroike të minatorëve dhe në përgjithësi të popullit të Kosovës në rrugën e drejtë për liri./Arbesh.info.