Ministri i Punëve të Brendshme, Skender Hyseni, sot ka zgjedhur t’i vizitojë tri komuna fqinje, Obiliqin, Fushë Kosovën dhe Shtimen.

Në Obiliq, ministri Hyseni takoi kryetarin e kësaj komune, Xhafer Gashi dhe Këshillin Komunal për Siguri në Bashkësi.

Sikurse edhe në takimet tjera, edhe në këtë takim u diskutua lidhur me gjendjen e sigurisë në përgjithësi, ekstremizmin fetar, pjesëmarrja në luftërat e huaja.

“Kosova shquhet për harmoni ndër-fetare dhe çfarëdo përpjeke për mos tolerancë është e papranueshme”, tha ministri Hyseni.

Edhe në komunën e Fushë Kosovës, ministri Hyseni u prit nga kryetari Burim Berisha dhe Këshilli Komunal për Siguri në Bashkësi.

Në Fushë Kosovë u raportua për rënie të shkallës së krimit në përgjithësi, duke theksuar se për vitin 2015 nuk është raportuar në polici asnjë vrasje.

Pas takimeve në Obiliq dhe Fushë Kosovë, vizita e ministrit Skender Hyseni ka vazhduar për në komunën e Shtimes, ku takoi nënkryetarin e komunës së Shtimes, Fatmir Rashiti dhe Këshillin Komunal për Siguri në Bashkësi.