Kryetari i Lëvizjes Vetëvendosje, Albin Kurti, ka ftuar qytetarët e komunës së Prishtinës që në zgjedhjet e 12 tetorit ta votojnë kandidatin e LVV-së për kryetar, Hajrulla Çekun.

Kurti ka thënë se me Çekun kryetar Prishtina do të bëhet qyteti që frymon zhvillim, kulturë, sport e inovacion.Sipas tij, zgjedhjet e 12 tetorit janë referendum për të ardhmen e kryeqytetit.

“Zgjedhja është e thjeshtë: ose për Prishtinën e stagnimit, privatizimit e korrupsionit, ose për Prishtinën e barazisë, zhvillimit dhe vizionit. Zgjedhja e duhur është vetëm një: Hajrulla Çeku. Një njeri i thjeshtë, i përkushtuar, i ditur, i kulturuar, e me rezultate të mëdha. Hajra është profesionist i vërtetë. Para së gjithash, me magjistraturë në Qeverisje dhe Zhvillim Lokal, ai e ka dëshmuar veten si një nga ministrat më të mirë që ka pasur Kosova. E mbi të gjitha, është vizionar: me platformën “Prishtina 2035”, ai ka një plan të qartë për një Prishtinë funksionale, të pastër, të gjelbër e përplot jetë”- ka thënë Kurti në një video-mesazh.

Zgjedhjet për kryetar të komunave në Kosovë do të mbahen më 12 tetor 2025./Arbresh.info/