Ministri gjerman i Financave, Olaf Scholz, bëri thirrje për zbatimin e një takse botërore mbi kompanitë teknologjike dhe nëse miratohet, një lëvizje e tillë do të detyronte kompanitë në fjalë të paguajnë taksa në vendet ku gjenerojnë të ardhurat dhe jo vendet ku janë të regjistruara.

Kompanitë e mëdha si Google, Apple, Facebook dhe Amazon kanë vendosur zyrat e tyre qendrore për operacionet Evropiane në vende me taksa të ulëta si Irlanda dhe Luksemburgu, përcjell Telegrafi.

Kjo lëvizje ka ngjallur reagimin e vendeve si Franca, Italia dhe Britania e Madhe të cilat kërkojnë që kompanitë në fjalë të paguajnë taksa në vendet e tyre.

Scholz ka punuar së afërmi me Francën dhe Organizatën për Bashkëpunim dhe Zhvillim Ekonomik për zhvillimin e një plani për vendosjen e taksave. /Telegrafi/