Një nga dilemat kryesore para përballjes së Real Madridit ndaj Monacos ishte nëse tifozët e ekipit madrilen do të vazhdonin me fishkëllimat, ashtu siç ndodhi të shtunën e kaluar në ndeshjen e La Ligës ndaj Levantes. Përgjigjja ishte po, por këtë herë në një intensitet dukshëm më të ulët.

Gjatë nxehjes para ndeshjes, nga tribunat e “Santiago Bernabeut” u dëgjuan fishkëllima, por edhe duartrokitje, duke treguar një ndarje të qartë të opinionit mes tifozëve. Në këtë reagim u përfshinë edhe tifozët mysafirë të Monacos.

Kur përmes altoparlantëve të stadiumit u thirrën emrat e lojtarëve, fishkëllimat u përqendruan vetëm tek tre futbollistë.

Huijsen dhe Jude Bellingham u fishkëllyen lehtë, ndërsa Vinicius Junior mori më shumë reagime negative, por gjithsesi shumë më pak krahasuar me atë që ndodhi fundjavën e kaluar.

Ndryshe nga ndeshja ndaj Levantes, ku pothuajse i gjithë ekipi u fishkëllye, kësaj radhe tifozët u treguan më të përmbajtur, duke reflektuar një qëndrim më të moderuar ndaj skuadrës.

Pas pjesës së parë Reali po fiton 2-0./Arbresh.info