Gjiganti gjerman Bayern Munich do të përballet me Paris Saint-Germain në “Parc des Princes”, në një nga ndeshjet më të mëdha të sezonit në gjysmëfinalet e UEFA Champions League.

Bavarezët vijnë në këtë sfidë në formë të shkëlqyer, pasi kanë siguruar tashmë titullin në Bundesligë dhe janë ende në garë për Kupën, duke synuar një sezon të jashtëzakonshëm me të gjitha trofetë.

Megjithatë, përballja e parë në Paris do të ketë një mungesë të madhe për gjermanët.

Trajneri kryesor Vincent Kompany nuk do të lejohet të jetë në stol për shkak të pezullimit, dhe vendin e tij do ta marrë ndihmësi Aaron Danks.

Sipas raportimeve të mediave gjermane, UEFA do të vendosë një mbikëqyrës të veçantë për të siguruar që Kompany të mos ketë asnjë kontakt me ekipin gjatë ndeshjes.

Trajneri belg do të udhëtojë me skuadrën drejt stadiumit, por sapo autobusi të arrijë, ai duhet të ndahet nga ekipi dhe nuk do të lejohet të hyjë në dhomat e zhveshjes.

Kjo bazohet në rregulloren disiplinore të UEFA-s, e cila ndalon qartë çdo trajner të pezulluar të ketë qasje në tunel apo në zhveshtore para dhe gjatë ndeshjes.

Rregullat janë edhe më të ashpra: Kompany nuk lejohet të komunikojë me lojtarët apo stafin teknik gjatë ndeshjes, qoftë drejtpërdrejt apo përmes telefonit.

UEFA pritet të vendosë një zyrtar pranë tribunës ku do të qëndrojë trajneri belg, për të monitoruar respektimin e këtyre rregullave gjatë gjithë kohës.

Megjithatë, mbetet e vështirë të kontrollohet plotësisht situata. Sipas raportimeve, ekziston mundësia që Kompany të gjejë mënyra alternative për të dërguar udhëzime, për shembull përmes një telefoni të një personi tjetër pranë tij.

Edhe pse një skenar i tillë do të ishte shkelje e rregullave, mbetet për t’u parë nëse UEFA do të arrijë të kontrollojë çdo detaj në një ndeshje kaq të madhe.

Sfida mes PSG-së dhe Bayernit pritet me interes të madh, jo vetëm për spektaklin në fushë, por edhe për situatën e pazakontë në pankinën e bavarezëve./Arbresh.info