Dukagjini po del të jetë befasia e këndshme e Superligës së Kosovës deri më tani, në edicionin e ri, që tashmë po i afrohet pushimit dimëror.

Skuadra nga Klina është e treta në tabelën e klasifikimit, por ka pikë të barabarta me Ballkanin e vendit të parë, dhe Prishtinën e vendit të dytë – me nga 26 pikë secila.

Në këtë sukses të Dukagjinit ka gisht edhe trajneri i ri, Ndue Përgjokaj, i cili tashmë është pa humbje në tri ndeshjet e para si trajner i bardhegjelbërtve.

Pas largimit të Ismet Munishit, pas humbjes nga Malisheva në Klinë, drejtimin e skuadrës e mori Përgjokaj, i cili e ka vazhduar punën e mirë të trajnerit Munishi.

Përgjokaj ka tri ndeshje në krye të Dukagjinit, duke i fituar të triat.

Fillimisht, Dukagjini e mposhti Ferizajn 1-0 në udhëtim, teksa e mposhti Drenicën si vendas me shifrat prej 3-0.

Fitore të madhe, Dukagjini mori edhe sot ndaj Llapit në Pdujevë. Klinasit fituan 1-0.

Përgjatë periudhës së Përgjokajt si trajner, Dukagjini ka shënuar pesë gola, duke mos pranuar asnjë.

Ndeshjen e ardhshme, Dukagjini e luan ndaj Ramiz Sadikut në Kupën e Kosovës.