Trajneri dhe analisti i futbollit nga Shkodra, Astrit Hafizi, ka thënë se e ëndërron ditën kur Kombëtarja e Shqipërisë do të luajë në nivelin e ekipit të Kosovës.

Mbrëmë, në orën 20:45, edhe Shqipëria, edhe Kosova zhvilluan ndeshje në kuadër të kualifikimeve për Kampionatin Evropian 2020, përcjell Gazeta Express.

Kuqezinjtë siguruan fitore si mysafir me rezultat 3:0 ndaj Andorrës, ndërsa “Dardanët” barazuan me rezultat 1:1 kundër Bullgarisë në stadiumin “Fadil Vokrri”.

Megjithatë, Bullgaria renditet shumë më mirë sesa Andorra në ranglistën e FIFA-s. Bullgarët janë në pozitën e 48-të, ndërsa Andorra radhitet në pozitën e 132-të, dy pozita më poshtë se Kosova.

“Ëndërroj kur kombëtarja e Shqipërisë do të luajë në nivel te Kombëtares së Kosovës, e cila po luante me Bullgarinë sikur te luante me Andorrën”, tha Hafizi dje për SuperSport.

Kosova krijoi mjaft shumë raste për ta shënuar golin e fitores në pjesën e dytë të ndeshjes, megjithatë djelmoshat e Bernard Challandes nuk arritën ta gjejnë rrjetën më shumë se një herë brenda 90 minutave.