‘Minatori’ është nikoqire e finales së parë të Play-offit në kuadër të basketbollit kosovar, ku do të përballet Trepça dhe Golden Eagle Ylli.

Ndeshja fillon nga ora 19:00, shkruan Arbresh.info.

‘Xehetarët’ janë në finale për të tretin vit me radhë kurse Ylli kthehet pas një viti mungesë.

Mitrovicasit kanë qenë në formë të lartë gjatë sezonit të rregullt ku kanë dal të parët në tabelë me 25 fitore e tri humbje, teksa Ylli ka qenë i treti me 19 fitore e tetë humbje.

Skuadra e drejtuar nga Adis Beciragic erdhi në finale pasi eliminoi Sigal Prishtinën në gjysmëfinale me seri 3-0, teksa të udhëhequr nga Petar Mijovic, suharekasit fillimisht mposhtën Bashkimin në çerekfinale me seri 2-0.

Kurse për të arritur në finalen e madhe triumfuan ndaj Pejës në një dramë të vërtet me seri 3-2.

Kujtojmë që Trepça për herë të fundit është shpallur kampion në vitin 2012 kurse Ylli dy vite më parë.

Gjatë këtij sezoni këto skuadra janë përballur gjashtë herë, ku katër prej tyre i kanë i fituar Trepça teksa dy Ylli./Arbresh.info/