Sonte nis faza e katërt dhe e fundit për sezonin e rregullt në elitën e basketbollit kosovar, ku gjatë këtyre ndeshjeve vendimtare pritet të vendoset gjithçka se kush ku do të pozicionohet.

Ditën e sotme luhen dy ndeshje, kampionia në fuqi dhe liderja aktuale udhëton tek Peja, shkruan Arbresh.info.

Një sfidë tjetër tejet interesante dhe po ashtu vendimtare është ajo e Rahovecit 029. ‘Vreshtarët’ presin në shtëpi Borën, ku fitorja është e domosdoshme duke marrë parasysh që ndodhen në pozitën e fundit, me një fitore larg zonës së play-outit, por edhe zonës që të dërgon në play-off.

Nesër pritet të takohen Golden Eagle Ylli dhe Prishtina. Të dy këto skuadra luftojnë për një vend në play-off. Pas 21 xhirove të dy klubet kanë nga 8 fitore e 13 humbje.

Ylli është i pesti, derisa Prishtina e shtata, pozitë kjo që të dërgon në play-out. Humbja është fatale për dy skuadrat kështu që do të luftohet vetëm për fitore.

Sfida tjetër është ajo mes Bashkimit dhe Vëllaznimit. Bashkimi synon fitoren ta blindojë pozitën e dytë dhe garat e play-offit t’i nis nga gjysmëfinalja.

Teksa për Vëllaznimin një humbje është e hidhur, pasi mbesin edhe gjashtë ndeshje për ta evituar rënien në Ligën e Parë.

Sikurse Ylli e Prishtina edhe Vëllaznimi ka tetë fitore e 13 humbje.

Tashmë të gjitha skuadrat kanë përfunduar të gjitha afrimet me lojtarët e huaj, dhe tashmë rosteret janë të kompletuara. Secila ndeshje është jetë a vdekje për shumicën e klubeve.

Shtatë xhirot e fundit pritet t’i dhurojnë publikut ndeshje të jashtëzakonshme dhe si zakonisht palestrat në këtë pikë të sezonit pritet të jenë të mbushura me simpatizantë, që mbështesin skuadrat e tyre.

Kujtojmë se të gjitha ndeshjet e kësaj xhiro nisin me fillim nga ora 19:30./Arbresh.info