Bota e futbollit është ende në ankth të madh për shëndetin e Sir Alex Fergusonit. Ish-trajneri legjendar i Manchester United u shtrua mbrëmjen e së shtunës në gjendje kritike në spital, ku iu nënshtrua një ndërhyrjeje kirurgjikale për hemorragji cerebrale, e deri tani kanë munguar informacionet në lidhje me gjendjen e tij.

Njoftimi i fundit i publikuar ishte komunikata e Manchester United, që theksonte se operacioni i Sir Alex shkoi mirë dhe se atij i duhet të qëndrojë për disa kohë në terapi intensive.

Ndërkaq, sipas neurokirurgut Peter Hamlyn, forma më e zakonshme e hemorragjisë në tru për një njeri të moshës së Ferguson (76 vjeçe) me një histori të problemeve kardiovaskulare është intracerebral, ku ka gjakderdhje brenda trurit që shkakton dëme të pandreqshme në qeliza.

Në rastin e Fergusonit, kirurgët e tij kanë vendosur të kryejnë operacionin sepse besonin që gjakderdhja po shkaktonte dëme në indet e trurit.

Ky është një operacion që kryhet në mënyrë që Sir Alex në të ardhmen të mos ketë paaftësi që mund të lidhen si pasojë e këtij sulmi.

Doktorët ndërkaq, kanë bërë të ditur se javët e ardhshme do të jenë kritike për shëndetin e 76-vjeçarit.

Ndërkohë, gjatë këtyre ditëve kanë vërshuar mesazhet inkurajuese për skocezin, jo vetëm nga futbollistët e ish-futbollistët e Manchester United, por edhe nga ata të skuadrave të tjera, trajnerë e klube të ndryshëm.

Sir Alex Ferguson është trajneri më i suksesshëm në historinë e futbollit britanik. Në 26 vitet e qëndrimit të tij në drejtimin e Manchester United, ai ka fituar 38 tituj, nga të cilat 13 në Premier League e 2 në Champions League.