Real Madridi ka shumë pak gjasa ta realizojë transferimin e mesfushorit të PSG-së, Vitinha. Kështu raporton eksperti italian i transferimeve, Fabrizio Romano.

“Los Blancos” synojnë ta forcojnë mesfushën gjatë afatit kalimtar veror dhe portugezi shihet si objektiv ëndrrash për drejtuesit madrilenë.

Megjithatë, Paris Saint-Germain e konsideron Vitinhan shtyllë kryesore të mesfushës dhe nuk ka ndërmend të ndahet nga ai.

Sipas raportimeve, PSG është i gatshëm të dëgjojë oferta vetëm në shifra marramendëse, duke pasur parasysh se lojtari ka kontratë të vlefshme deri në vitin 2029.

Për më tepër, ish-mesfushori i Portos nuk ka asnjë dëshirë të largohet nga “Parc des Princes”, ku është ambientuar shumë mirë.

Vitinha gëzon respekt të madh për trajnerin Luis Enrique, i cili po këmbëngul ta mbajë atë me çdo kusht në ekip. Në këto rrethana, Real Madridi pritet ta zhvendosë fokusin drejt alternativave të tjera në treg.

Në listën e objektivave të mundshëm përfshihen emra si Alexis Mac Allister (Liverpool), talenti i AZ Alkmaar, Kees Smit, si dhe Nico Paz që aktualisht luan te Como.