Real Madrid po e shqyrton seriozisht mundësinë që trajneri argjentinas Mauricio Pochettino të marrë drejtimin e skuadrës për sezonin e ardhshëm.

Me të ardhmen e Álvaro Arbeloa ende të paqartë pas paraqitjeve të ekipit që nga momenti kur mori drejtimin, drejtuesit madrilenë po analizojnë disa alternativa për pankinën.

Sipas raportimeve, Pochettino është një nga kandidatët kryesorë për të pasuar Arbeloan pas përfundimit të Kupës së Botës që do të zhvillohet në SHBA, Meksikë dhe Kanada, njëkohësisht edhe në momentin kur pritet të përfundojë kontrata e tij si trajner i kombëtares së Shteteve të Bashkuara të Amerikës.

Megjithatë, në orët e fundit në garë është futur fuqishëm edhe Tottenham Hotspur, që po e konsideron rikthimin e trajnerit argjentinas në Londër.

Rikthimi te Tottenhami shihet si një opsion shumë tërheqës për Pochettinon. Ai e njeh shumë mirë klubin londinez, ku ka punuar më parë dhe ku vazhdon të gëzojë respekt të madh nga tifozët dhe drejtuesit. Një rikthim i tillë do t’i jepte mundësinë të nisë një projekt të ri me më shumë kohë dhe besim për të ndërtuar skuadrën.

Ndryshe nga kjo, te Real Madridi presioni për rezultate është i menjëhershëm dhe durimi shpesh është i kufizuar. Një situatë të tillë e kanë përjetuar edhe trajnerë të tjerë të mëdhenj në të kaluarën, si për shembull Xabi Alonso.

Një tjetër faktor që e bën situatën të paqartë është fakti se Real Madridi ka edhe emra të tjerë në listën e kandidatëve për trajner. Mes tyre përmenden edhe Jürgen Klopp dhe Massimiliano Allegri, ndërsa drejtuesit e klubit ende nuk kanë marrë një vendim përfundimtar.

Nga ana tjetër, Tottenhami nuk po mbështetet vetëm te Pochettino. Sipas mediave angleze, alternativa tjetër për klubin londinez është trajneri italian Roberto De Zerbi, i cili së fundmi u largua nga Olympique de Marseille. De Zerbi kishte bërë një punë të shkëlqyer më parë me Brighton & Hove Albion në Premier League dhe aktualisht është i lirë në treg.

Ndërkohë, Pochettino u pa së fundmi në Madrid, ku udhëtoi për të ndjekur nga afër ndeshjen e Atlético Madrid kundër Tottenham Hotspur në UEFA Champions League. I pyetur për të ardhmen e tij nga emisioni sportiv El Chiringuito de Jugones, ai u përgjigj shkurt: “Gjithçka në kohën e vet”.

Aktualisht, trajneri argjentinas mbetet i fokusuar te kombëtarja amerikane dhe objektivi i tij kryesor është të bëjë një paraqitje sa më të mirë në Kupën e Botës së ardhshme, përpara se të marrë një vendim për hapin e radhës në karrierën e tij./Arbresh.info