Neymar thuhet se ka vendosur të qëndrojë te Paris Saint-Germaini, madje edhe nëse miku i tij, Lionel Messi, largohet nga kampioni i Ligue 1 në afatin kalimtar veror.

Braziliani është i lidhur për klubin nga kryeqyteti francez deri në vitin 2027 dhe dëshiron ta respektojë kontratën e tij.

L’Equipe bën të ditur se futbollisti më i shtrenjtë i të gjitha kohërave (ai u transferua nga Barcelona për 222 milionë euro në vitin 2017) do ta vazhdojë karrierën në Parc des Princes, përkundër se klubi është i interesuar ta vendosë në listën e shitjeve këtë verë.

Në anën tjetër, Messit i skadon kontrata në fund të këtij edicioni dhe nuk ka shenja për rinovimin e saj, por edhe në rast të largimit të superyllit argjentinas, Neymar dëshiron të qëndrojë.

Ndryshe, deri më tani vetëm Chelsea dhe Newcastle United janë dy klubet e interesuara që mund t’i bëjnë ballë pagës së tij të lartë. /Telegrafi/