Presidenti i Paris Saint-Germainit, Nasser Al-Khelaifi, ua ka bërë me dije klubeve të mëdha evropiane, e veçanërisht Real Madridit, se Neymari dhe Kylian Mbappe nuk janë në shitje.

Thashethemet rreth të ardhmes së yjeve të PSG-së vazhdojnë, posaçërisht për të ardhmen e Neymarit dhe Kylian Mbappes.

Por, Al-Khelaifi e pranon se kampioni i Ligë 1 mund t’i mbajë yjet në klub, përkundër interesimit të madh nga top klubet evropiane.

Duke folur për të përditshmen spanjolle Marca, Al-Khelaifi këmbënguli se asnjëri prej tyre nuk do të largohet nga klubi.

“As Real Madridi e as një klub tjetër në botë nuk ka nevojë të na telefonojë për Neymarin apo ndonjë lojtar tjetër. Real Madridi e di shumë mirë se Neymari nuk është në shitje dhe se ai nuk do të largohet nga PSG-ja këtë verë. Ne kemi marrëdhënie fantastike me Neymarin dhe babanë e tij, e cila është e ndërtuar për të zgjatur për shumë kohë”, tha ai.