Për herë të parë në histori, një gjyqtare shqiptare do të drejtojë një ndeshje të UEFA Champions League

19:05 | 29 Janar 2024
D.H

Për herë të parë në histori, një gjyqtare shqiptare do të drejtojë një ndeshje të UEFA Champions League për femra.

Emanuela Rusta do të ndajë drejtësinë në ndeshjen ndërmjet Benfica-Barcelona, e vlefshme për raundin e gjashtë të UEFA Champions League, shkruan Arbresh.info.

Një nga ndihmëset e saj do të jetë, Edjena Kapxhiu në rolin e asistentes së parë.

Ndeshja e femrave mes Benficës dhe Barcelonës do të luhet në Portugali më datë 31 janar, me fillim nga ora 21:00.

Ky është një tjetër lajm i shkëlqyer dhe një sukses për arbitrimin shqiptar dhe Federatën Shqiptare të Futbollit, që marrin një vlerësim të tillë nga UEFA.

Emanuela Rusta dhe Edjena Kapxhiu janë të pajisura me stemën e FIFA-s, ndërsa në qershorin e vitit 2023 Rusta u bë arbitrja e parë femër e promovuar nga Komiteti i Arbitrave në UEFA, duke u ngjitur në kategorinë e parë.

Deri më tani, Emanuela Rusta dhe Edjena Kapxhiu kanë drejtuar vetëm në sfidat kualifikuese, ndërsa të mërkurën në mbrëmje do të shkruajnë historinë duke drejtuar një ndeshje grupi në UEFA Champions League për femra./Arbresh.info/