Më 3 maj 2016, Atlético Madrid siguroi kualifikimin në finalen e fundit të UEFA Champions League deri më sot, pasi eliminoi Bayern Munich në gjysmëfinale. Në atë kohë, një djalosh 16-vjeçar nga Argjentina, Julián Álvarez, nuk donte ta humbiste këtë përballje.

Pavarësisht diferencës në orar, ai bashkë me një shok klase e ndoqi ndeshjen nga banka e shkollës në Buenos Aires, duke përdorur telefonin. Një moment i thjeshtë, por që sot merr kuptim të veçantë.

El tiempo vuela, el sentimiento permanece. Protagoniza tu propia historia ❤️🤍 https://t.co/R5znRoLtlO pic.twitter.com/fdsPCU5arZ

— Atlético de Madrid (@Atleti) May 4, 2026

Dhjetë vite më vonë, Álvarez nuk është më një tifoz i zakonshëm. Ai pritet të jetë protagonist në një tjetër gjysmëfinale të Atlético Madridit – kësaj radhe në fushë, si një nga lojtarët kryesorë të skuadrës.

Sulmuesi argjentinas ka kaluar një periudhë të vështirë së fundmi për shkak të një dëmtimi në kyçin e këmbës, të pësuar në ndeshjen ndaj Arsenal.

Ai mungoi në sfidën ndaj Valencias për t’u rikuperuar, ndërsa në stërvitjen e fundit para ndeshjes në Londër testoi gjendjen fizike. Sipas raportimeve, Álvarez është gati dhe synon të jetë vendimtar për ta dërguar ekipin në finale.

Në vitin 2016, ai sapo kishte nisur jetën në Buenos Aires, në konviktin e River Plate për talentët e rinj. Ishte një periudhë sfiduese për të, larg familjes dhe qytetit të tij të lindjes, Calchín, por pasioni për futbollin e mbante të fortë.

Ndërkohë që Álvarez ndiqte ndeshjen nga shkolla, disa nga lojtarët që sot janë bashkëlojtarë të tij po luftonin në fushë. Jan Oblak bëri paraqitje heroike duke pritur edhe një penallti, Koke ndihmonte në mbrojtje dhe organizim, ndërsa Antoine Griezmann shënoi golin vendimtar që dërgoi Atléticon në finalen e Milanos.

Sot, shumë gjëra kanë ndryshuar. Diego Simeone vazhdon të drejtojë ekipin, disa nga protagonistët janë ende pjesë e skuadrës, ndërsa Álvarez është shndërruar në një yll botëror.

Që nga ajo kohë, ai ka debutuar me River Plate, ka fituar Copa Libertadores, është transferuar te Manchester City ku fitoi edhe Champions League, dhe në vitin 2024 iu bashkua Atlético Madridit si lider i projektit.

Tashmë, historia ka bërë një rreth të plotë: nga një nxënës që ëndërronte duke parë një gjysmëfinale, në një futbollist që do ta jetojë atë në fushë./Arbresh.info