Milani po përgatit një ofertë për mesfushorin e Bayer Leverkusenit, Granit Xhaka, raporton gazetari i njohur Fabrizio Romano.

Sipas burimeve pranë klubit, takimet mes palëve për të diskutuar transferimin janë planifikuar për javën e ardhshme.

Xhaka iu bashkua Bayer Leverkusenit në korrik të vitit 2023, pasi u transferua nga Arsenali për 15 milionë euro. Kontrata e tij me kampionët e Gjermanisë është e vlefshme deri në qershor të vitit 2028.

Gjatë këtij sezoni, reprezentuesi i Zvicrës ka zhvilluar 49 ndeshje, duke shënuar 2 gola dhe dhuruar 7 asistime.

Ndërkohë ‘Calciomercato’ raporton se Milani po shqyrton mundësinë që të përfshijë mbrojtësin Malick Thiaw në një marrëveshje shkëmbimi për të ulur koston e transferimit të Xhakës.

Bayer Leverkusen ka treguar interes për Thiaw prej kohësh, dhe kjo mund të jetë një pikë e favorshme në negociata për kuqezinjtë.

Megjithatë, ende mbetet e paqartë nëse Bayer do të pranojë një shkëmbim të tillë dhe se çfarë roli mund të luajnë tarifat shtesë në këtë marrëveshje të mundshme. /Telegrafi/